مركز إبن عاطف للدراسات الإنمائية
ده طبعا مالهوش أى علاقه لا من قريب ولا من بعيد بمركز أبن خلدون بتاع سعدالدين إبراهيم
ندخل فى الدراسة بقى
صلى على النبى يا معلم
محمد نبى وموسى وعيسى نبى وكل من له نبى يصلى يعنى
بيقولك يا ريس ومش عارف قابلك فين علشان يقولك المهم عديها المرة أدى وخد منى وأهدى الأول وقول هديت
(( الشعب المصرى أجبن شعب فى العشرين او التلاتين او الخمسه تلاتين سنه الاخيرة ))
شعب بقى الخوف بيقتله وبيحدد له كل خططه وخطواته
شعب مش بيتحرك غير لما يستشير إله الخوف بتاعه حاجة كده زى أله المطر والجمال والرياح بتوع الفراعنه ايام زمان
شعب بقى خايف يتقدم خطوة واحده لقدام لنفسه او للبلد او للحياه اصلا
شعب بقى كل خوفه من ورا الشمس
مع أنه مش معروف لحد دلوقتى ورا الشمس دى ايه
يمكن ورا الشمس نور
يمكن ورا الشمس قمر
يمكن ورا الشمس فجر جديد
شعب ادمن العصايه والسكوت
شعب باع نفسه وباع كل حاجه ممكن علشانها يعيش أنسان كريم محترم فى بلده
شعب غرق منه أكتر من ألف فى عباره وساب صاحب العباره يطلع يتمتع بدم الضحايا فى بلاد اوروبا
ولا أتحرك ولا دافع عنهم ولا دور عليهم حتى
شوف لو ده حصل فى شعب واعى شوية لو حصلت فى بلد ناسها خايفه عليها كانت ردة فعلهم حتكون ايه
شعب اتحرق أكتر من 350 فى قطر قبل العيد وبرضو كعادته سكت ورضى بالسكوت
شعب اتدفن منه مئات فى جبل الدويقة بالحيا ولا كان عنده اى حياء ولا دور عليهم ولا حاسب اللى سابوها تقع فوق راسهم
شعب ما بقاش عارف نفسه رايح فين ولا حتى هوه جاى منين
شعب باع القضيه كل القضايا وفاكر نفسه كده ارتاح
لا هوه كسب القضية ولا جه عليه ولا حيجى يوم ويرتاح طول ماهوه كده خايف جبان ساكت وراضى
والشعب بكل طوائفه مشارك فى حالة الجبن والطناش
من أول السياسى إللى بعيد عن الشعب وعن همومه ومشاكل وعايش فى نفس البرج العالى إللى عايش فى حراميه النظام المتحكم
لحد اخر طائفه فيه قضاة ومحامون ودكاتره ومنهدسين وعلماء ورجال دين
الكل مشارك فى الخيانة
خيانة ارض وتاريخ
خاية بلد
بلد باعها الحراميه باعوها لاقرب الاعداء وقبضوا التمن الرخيص واللى دفعه الشعب من دمه بس كان خوفه وجبنه هوه الوسيط فى البيعه
يمكن يجى اليوم ويبطل خوفه ده ويرفع الجبن ده عن جبينه لكن ازاى وامتى وبمين وفين
مطلوب تعليقكم
هل كان الشعب المصرى جبان منذ بدأ التاريخ ؟ ام انه فقد شجاعته مع مرور الزمان ؟ ام انه مازال يتحلى بالشجاعه ؟
هل تعتقد ان يخرج الشعب المصرى فى يوم من الايام معترض على ظلم وديكتاتوريه الحاكم كما نشاهد فى كل العالم مع شعوب واعيه ؟
